بسم الله الرحمن الرحيم
ابو علي وعياله
قصة باللهجة الكويتية
فقد بوسالم صديق عمره وجاره بو علي بالديوانية فقرر يروح يسأل عنه والاثنين من الرعيل الأول اللي ترك الزمن على وجوههم شقا الأيام، ومن وصل لبيت صديقه وطق الباب .. فتح له الهندي ودخله على بوعلي اللي شافه قاعد بالصالة ضايق خلقه حيل ومتكدر فسأله: علامك يا خوي ما بينت من مدة عسى ما شر، فيك شي؟
رد بو علي: لا ما شر.. تصور يا خوي أولادي صار لهم أكثر من شهر ما حد فيهم مر علي وسأل عني ما يدورون عن أبوهم عايش وإلا ميت، أنا ما أبي منهم شي ولا إني جابرهم يمرون على ... أكو تلفيونات ليش ما يطمئنون علي ويطمنوني عليهم؟
بوسالم: يمكن اتصلوا فيك بتليفوناتهم النقالة بس لقوها ما توصل أو أنت كنت خارج منطقة التغطية .
بوعلي: بذمتك هذا وقته؟!
بوسالم: يا خوي اضحك أشبقى من العمر .. اعذرهم الدنيا ما عادت مثل أول الكل لاهي يلهث وراء المادة .
بوعلي: عيالي ما هم محتاجين مادة من شهر أنا موزع عليهم الحلال بالتساوي ومسجلة باسمهم .
بوسالم: هذا السبب أنت جنيت على نفسك بعد ليس تزعل .
بوعلي: أش قصدك؟
بوسالم: الحين هم مو معتازينك علشان جذيه ما يسألون .
بو علي: لا... لا تقول هالكلام، هم لاهين مثل ما قلت من شوي .. لأن عيالي تربيتي وهذه ما هي سوالفهم.. لا على ولا مساعد يفكرون بالمادة.. أنا ما قصرت عليهم بشي.
بوسالم: أتمنى من الله يكون كلامك صح.
بوعلي: يعني فريت مخي .. تهقا ليش مو محتاجيني ما يبوني ولا يسألون.
بوسالم: أنا ما قلت جذيه شيل هالفكرة من مخك.
بوعلي: شلون تعتقد .. لو يصير فيني شي ما راح يحزنون ويتحسفون علي.
بوسالم: يصير فيك شي بعد كل هالأمراض اللي فيك بعد ايش تطلب .
بو علي: يعني لو أموت ما راح يهتمون وراح ينسوني ويقولون فكه .
بو سالم: أنت ليش تفاول على عمرك وتخرعني يا معود انا اكبر منك بجم شهر وفيني مليون علة .. اذكر الله .
بوعلي: والله فكره .. اشرايك يا بوسالم اسويها؟
بوسالم: ما انصحك تكفه.
بوعلي: لا .. لا فهمتني.
بو سالم: شنهو راح تسوي؟
بو علي: اسوي روحي ميت.
بو سالم لا حول ولا قوة إلا بالله .. أكيد ضرب فيوزك .. تعال صوبي اشوف حرارتك .. لا يكون صخنت!
بو علي: ما فيني شي.. هذه خطة وتجربه اعرف فيها ردة فعل عيالي وأشوفهم شلون راح يحزنون علي.
بو سالم: ليش تكردهم وتضيق خلقهم وأنت حي؟ اشراح تستفيد وهم راح يحزنون؟ اكيد أنت ما راح تعمر اصبر.
بو علي: أسمع .. اشوف حزنهم وبعدين اكشف لهم خطتي وابين لهم انا حي، وأكيد راح يفرحون ويحرمون يقاطعوني أو يسألون عني
بوسالم: ما أنصحك تسوي هالعملة .
بوعلي: وتبيني اضحك من قبل شوي خلنا نتسلى اش ورانا؟
بوسالم: يعني ما لقيت شي تتسلى فيه الا الموت لا يبا اعفيني انا اللي فيني كافيني.
بو علي افا يا ابو سالم وين الصداقة والجيرة انا ما لي غيرك وعمري ما طلبت منك شي إلا هالمرة ما ابيك تساعدني .
بوسالم: أخ منكم .. حيلي ومساحلجي وبسرعة تقص علي ... حاضر قول اشراح تسوي .
بو علي يقول خطته انه راح يمثل دور الميت وما على بو سالم الا أن يتصل بعياله يبلغهم بالخبر بس أول ما يدخلون من الباب علشان لا يتوزع خبر الموت الكاذب . وبدأت الخطة ... واتصل بو سالم بولد بو علي الكبير (علي) وقال له تعال بسرعة أبوك يحتضر وطالبك ويكرر العملية مع الولد الثاني (مساعد) ويسكر التلفون ويتلفت على صاحبه بو علي ويقوله: الحين بعدما ما وهقتني شسوي؟
بو علي: لا وهقتك ولا شي الحين أنطرهم واول ما تسمع جرس الباب تروح تفتح وانت تنجي .
بوسالم: والهندي شنهو شغله اخاف يفضحنا .
بو علي: الهندي لا تحاتيه الحين هو كاشخ بسيارتي ومركب معاه جماعته ويفتر عند دوار الجهراء انا عطيته اجازة .
بوسالم: والله لو ما اني اعرف انك بو علي صاحبي جان قلت عنك هذا اللي يلبس بالطو " وصخ" بالمسلسل اللي اللي اللي اسمه كاسترو !
بو علي: يضحك: كاستروا وما كاستر يا الغشيم كولمبوس .
بوسالم: روح يعني يعرف انت ايش عرفك بالانجليزي اسمه كاسترو تراهن .
بوعلي: لا ما اراهن يعني انت اللي تعرف انجليزي .
بوسالم " طبعاً واحسن منك احط على تلفزيون الكويت لان برامجه تلوع الجبد ودائماً اتابع المحطات الانجليزية مو المحطات العربية اللي انت خابرها وتقابلها يومياً تطالع المذيعات وتتنهد .
بوعلي: اشدعوه انت تطالع مثلي؟ !
بوسالم: بلى قبل لاتطيح عليي الحجية ...
يقطع حجيهم ومعاياتهم صوت جرس الباب ويروح بو علي للباب يفتحه ولكن بو سالم يسحبه .
ويقول له: انت وين رايح مو المفروض انك ميت .
بو علي: اي اي .. نسيت ويركض للحجرة ويتمدد على سريره ويتظاهر بالموت .
بوسالم: هذه بدايتها .. حق التوهق ويروح للباب وهو يقول زين زين وهو يتظاهر بالحزن والا اللي بالباب الولد الكبير علي اللي يدخل وهو يقول وين ابوي علامه؟ ويرد عليه بوسالم ابوك عطاك عمره الله يرحمه .
علي: لا تقول جذيه ويركض للحجرة وهم يصرخ يبا يبا .
بو علي:هو على السرير يتأثر بصراخ ولده ويمسك دمعته من عينه ويقول بقلب (ايه تربيتي ما راحت بلاش ) .
علي يدخل للحجرة ويسكر عليه الباب وبسرعة يلقي نظرة على ابوه ويفتح درج الكوميدنه ويطلع مفتاح التجوري ويفتح ويطلع منه الأوراق وذهب امه والفلوس يعدهم.
بوعلي: يمسك نفسه بعد ما بدأ دمه يغلي ولأنه سمع صوت مساعد ولده الصغير يبجي واللي من سمعه أخوه علي قام يخش الذهب والفلوس ولكن مساعد دخل الحجرة وطاح عليه.
وقال: ايه جذيه السالفة.
علي: اسكت هالكلام مو وقته ابوك ميت.
مساعد: ابوي بروحي ما هو ابوك ليش ماخذ الفلوس شنهي السالفة من سبق لبق؟!
علي: لا انت فاهم غلط هذه فلوسي بس انا مخليها عند أبوي أمانة قبل يفتقش.
مساعد: مخليها أمانة ليش شايفني داهن راسي دهن ... أنا ماني خبل تقص علي ما اخليك والله ... ويمسك أخوه يبي يأخذ اللي عنده .
بوعلي بقلبه: ايا عيال الكلب انا ابوكم ميت شوفوني ايجوا علي.
علي: اسمع يا مساعد وخر عني راح تخليني تدري ليش؟
مساعد: ليش بالله؟
علي: لأن ابوي عطاك البيت هذا وسجله لك غير اراضي مشرف الثلاث و.
مساعد: بيت واراضي البيت ليما الحين هو فيه ما يصير ملكي الا لما يندفن والاراضي هذه اللي نفتر فيها طايح حظها بمنطقة ما راح تجليها الخدمات الا بعد كم سنة ما أنت فأخذت عمارة السالمية اللي كل شهر تدر عليك فوس بالهبل .. هالفلوس انا لازم آخذها .
علي: شوف هدني احسن لك ولا تطول السانك قدام أخوك الكبير .
بو علي وهو نايم ... انتو ما احترمتوا شيبة ابوكم .. وشوي شوي يزيد ضغطه .
مساعد: احترامك اذا عطيني الفلوس والذهب اللي اخذتها من التجوري .
علي: خذ هذا مسباح كهرب غالي وساعة ابوي الوست أند .
مساعد: خلهم لامك، هد الفلوس يالله .
علي: ما راح اهد شي .
ويطارحون الاثنين ويصير مطاقق بوكسات ويدخل بو سالم ويحاول يفاككهم ولكن يحوشه يمع فيتكودو على السرير جنب جاره وصديق عمره بون .
ويقول: قوم يا بوعلي شوف عيالك لا بارك الله فيك وفيهم كسروا طقم أسناني الجديد ... ما تقوم بوعلي ... بوعلي ... اشفيك ما ترد .
بو علي ما يرد لانه مات صج بعدما ارتفع ضغطه من شاف حي عيالاه له، مات من القهر لانه رباهم وعلمهم وما تزوج على امهم يوم ماتت علشان لا يظلمهم وفوق هذا وزع عليهم الحلال .
والمشكلة بعد ما حاول بوسالم يقعد صاحبه ولقاه ميت وقف قلبه خوف وحزن على رفيق العمر وتمقطوا الاثنين على سرير واحد والأولاد ما زالوا يطارحون .
وما ندري منهو ذبح الثاني ... بس يقولون انه اللي أخذ الفلوس أكثرهم حنية على أبوه . !!
ابو علي وعياله
قصة باللهجة الكويتية
فقد بوسالم صديق عمره وجاره بو علي بالديوانية فقرر يروح يسأل عنه والاثنين من الرعيل الأول اللي ترك الزمن على وجوههم شقا الأيام، ومن وصل لبيت صديقه وطق الباب .. فتح له الهندي ودخله على بوعلي اللي شافه قاعد بالصالة ضايق خلقه حيل ومتكدر فسأله: علامك يا خوي ما بينت من مدة عسى ما شر، فيك شي؟
رد بو علي: لا ما شر.. تصور يا خوي أولادي صار لهم أكثر من شهر ما حد فيهم مر علي وسأل عني ما يدورون عن أبوهم عايش وإلا ميت، أنا ما أبي منهم شي ولا إني جابرهم يمرون على ... أكو تلفيونات ليش ما يطمئنون علي ويطمنوني عليهم؟
بوسالم: يمكن اتصلوا فيك بتليفوناتهم النقالة بس لقوها ما توصل أو أنت كنت خارج منطقة التغطية .
بوعلي: بذمتك هذا وقته؟!
بوسالم: يا خوي اضحك أشبقى من العمر .. اعذرهم الدنيا ما عادت مثل أول الكل لاهي يلهث وراء المادة .
بوعلي: عيالي ما هم محتاجين مادة من شهر أنا موزع عليهم الحلال بالتساوي ومسجلة باسمهم .
بوسالم: هذا السبب أنت جنيت على نفسك بعد ليس تزعل .
بوعلي: أش قصدك؟
بوسالم: الحين هم مو معتازينك علشان جذيه ما يسألون .
بو علي: لا... لا تقول هالكلام، هم لاهين مثل ما قلت من شوي .. لأن عيالي تربيتي وهذه ما هي سوالفهم.. لا على ولا مساعد يفكرون بالمادة.. أنا ما قصرت عليهم بشي.
بوسالم: أتمنى من الله يكون كلامك صح.
بوعلي: يعني فريت مخي .. تهقا ليش مو محتاجيني ما يبوني ولا يسألون.
بوسالم: أنا ما قلت جذيه شيل هالفكرة من مخك.
بوعلي: شلون تعتقد .. لو يصير فيني شي ما راح يحزنون ويتحسفون علي.
بوسالم: يصير فيك شي بعد كل هالأمراض اللي فيك بعد ايش تطلب .
بو علي: يعني لو أموت ما راح يهتمون وراح ينسوني ويقولون فكه .
بو سالم: أنت ليش تفاول على عمرك وتخرعني يا معود انا اكبر منك بجم شهر وفيني مليون علة .. اذكر الله .
بوعلي: والله فكره .. اشرايك يا بوسالم اسويها؟
بوسالم: ما انصحك تكفه.
بوعلي: لا .. لا فهمتني.
بو سالم: شنهو راح تسوي؟
بو علي: اسوي روحي ميت.
بو سالم لا حول ولا قوة إلا بالله .. أكيد ضرب فيوزك .. تعال صوبي اشوف حرارتك .. لا يكون صخنت!
بو علي: ما فيني شي.. هذه خطة وتجربه اعرف فيها ردة فعل عيالي وأشوفهم شلون راح يحزنون علي.
بو سالم: ليش تكردهم وتضيق خلقهم وأنت حي؟ اشراح تستفيد وهم راح يحزنون؟ اكيد أنت ما راح تعمر اصبر.
بو علي: أسمع .. اشوف حزنهم وبعدين اكشف لهم خطتي وابين لهم انا حي، وأكيد راح يفرحون ويحرمون يقاطعوني أو يسألون عني
بوسالم: ما أنصحك تسوي هالعملة .
بوعلي: وتبيني اضحك من قبل شوي خلنا نتسلى اش ورانا؟
بوسالم: يعني ما لقيت شي تتسلى فيه الا الموت لا يبا اعفيني انا اللي فيني كافيني.
بو علي افا يا ابو سالم وين الصداقة والجيرة انا ما لي غيرك وعمري ما طلبت منك شي إلا هالمرة ما ابيك تساعدني .
بوسالم: أخ منكم .. حيلي ومساحلجي وبسرعة تقص علي ... حاضر قول اشراح تسوي .
بو علي يقول خطته انه راح يمثل دور الميت وما على بو سالم الا أن يتصل بعياله يبلغهم بالخبر بس أول ما يدخلون من الباب علشان لا يتوزع خبر الموت الكاذب . وبدأت الخطة ... واتصل بو سالم بولد بو علي الكبير (علي) وقال له تعال بسرعة أبوك يحتضر وطالبك ويكرر العملية مع الولد الثاني (مساعد) ويسكر التلفون ويتلفت على صاحبه بو علي ويقوله: الحين بعدما ما وهقتني شسوي؟
بو علي: لا وهقتك ولا شي الحين أنطرهم واول ما تسمع جرس الباب تروح تفتح وانت تنجي .
بوسالم: والهندي شنهو شغله اخاف يفضحنا .
بو علي: الهندي لا تحاتيه الحين هو كاشخ بسيارتي ومركب معاه جماعته ويفتر عند دوار الجهراء انا عطيته اجازة .
بوسالم: والله لو ما اني اعرف انك بو علي صاحبي جان قلت عنك هذا اللي يلبس بالطو " وصخ" بالمسلسل اللي اللي اللي اسمه كاسترو !
بو علي: يضحك: كاستروا وما كاستر يا الغشيم كولمبوس .
بوسالم: روح يعني يعرف انت ايش عرفك بالانجليزي اسمه كاسترو تراهن .
بوعلي: لا ما اراهن يعني انت اللي تعرف انجليزي .
بوسالم " طبعاً واحسن منك احط على تلفزيون الكويت لان برامجه تلوع الجبد ودائماً اتابع المحطات الانجليزية مو المحطات العربية اللي انت خابرها وتقابلها يومياً تطالع المذيعات وتتنهد .
بوعلي: اشدعوه انت تطالع مثلي؟ !
بوسالم: بلى قبل لاتطيح عليي الحجية ...
يقطع حجيهم ومعاياتهم صوت جرس الباب ويروح بو علي للباب يفتحه ولكن بو سالم يسحبه .
ويقول له: انت وين رايح مو المفروض انك ميت .
بو علي: اي اي .. نسيت ويركض للحجرة ويتمدد على سريره ويتظاهر بالموت .
بوسالم: هذه بدايتها .. حق التوهق ويروح للباب وهو يقول زين زين وهو يتظاهر بالحزن والا اللي بالباب الولد الكبير علي اللي يدخل وهو يقول وين ابوي علامه؟ ويرد عليه بوسالم ابوك عطاك عمره الله يرحمه .
علي: لا تقول جذيه ويركض للحجرة وهم يصرخ يبا يبا .
بو علي:هو على السرير يتأثر بصراخ ولده ويمسك دمعته من عينه ويقول بقلب (ايه تربيتي ما راحت بلاش ) .
علي يدخل للحجرة ويسكر عليه الباب وبسرعة يلقي نظرة على ابوه ويفتح درج الكوميدنه ويطلع مفتاح التجوري ويفتح ويطلع منه الأوراق وذهب امه والفلوس يعدهم.
بوعلي: يمسك نفسه بعد ما بدأ دمه يغلي ولأنه سمع صوت مساعد ولده الصغير يبجي واللي من سمعه أخوه علي قام يخش الذهب والفلوس ولكن مساعد دخل الحجرة وطاح عليه.
وقال: ايه جذيه السالفة.
علي: اسكت هالكلام مو وقته ابوك ميت.
مساعد: ابوي بروحي ما هو ابوك ليش ماخذ الفلوس شنهي السالفة من سبق لبق؟!
علي: لا انت فاهم غلط هذه فلوسي بس انا مخليها عند أبوي أمانة قبل يفتقش.
مساعد: مخليها أمانة ليش شايفني داهن راسي دهن ... أنا ماني خبل تقص علي ما اخليك والله ... ويمسك أخوه يبي يأخذ اللي عنده .
بوعلي بقلبه: ايا عيال الكلب انا ابوكم ميت شوفوني ايجوا علي.
علي: اسمع يا مساعد وخر عني راح تخليني تدري ليش؟
مساعد: ليش بالله؟
علي: لأن ابوي عطاك البيت هذا وسجله لك غير اراضي مشرف الثلاث و.
مساعد: بيت واراضي البيت ليما الحين هو فيه ما يصير ملكي الا لما يندفن والاراضي هذه اللي نفتر فيها طايح حظها بمنطقة ما راح تجليها الخدمات الا بعد كم سنة ما أنت فأخذت عمارة السالمية اللي كل شهر تدر عليك فوس بالهبل .. هالفلوس انا لازم آخذها .
علي: شوف هدني احسن لك ولا تطول السانك قدام أخوك الكبير .
بو علي وهو نايم ... انتو ما احترمتوا شيبة ابوكم .. وشوي شوي يزيد ضغطه .
مساعد: احترامك اذا عطيني الفلوس والذهب اللي اخذتها من التجوري .
علي: خذ هذا مسباح كهرب غالي وساعة ابوي الوست أند .
مساعد: خلهم لامك، هد الفلوس يالله .
علي: ما راح اهد شي .
ويطارحون الاثنين ويصير مطاقق بوكسات ويدخل بو سالم ويحاول يفاككهم ولكن يحوشه يمع فيتكودو على السرير جنب جاره وصديق عمره بون .
ويقول: قوم يا بوعلي شوف عيالك لا بارك الله فيك وفيهم كسروا طقم أسناني الجديد ... ما تقوم بوعلي ... بوعلي ... اشفيك ما ترد .
بو علي ما يرد لانه مات صج بعدما ارتفع ضغطه من شاف حي عيالاه له، مات من القهر لانه رباهم وعلمهم وما تزوج على امهم يوم ماتت علشان لا يظلمهم وفوق هذا وزع عليهم الحلال .
والمشكلة بعد ما حاول بوسالم يقعد صاحبه ولقاه ميت وقف قلبه خوف وحزن على رفيق العمر وتمقطوا الاثنين على سرير واحد والأولاد ما زالوا يطارحون .
وما ندري منهو ذبح الثاني ... بس يقولون انه اللي أخذ الفلوس أكثرهم حنية على أبوه . !!
